Ambasadori iranian në Shqipëri Ali Amui zhvilloi një vizitë zyrtare në Bashkinë e Korçës. Ai u prit nga Kryetari i Bashkisë, Niko Peleshi, i cili e cilësoi mjaft të rëndësishme vizitën e Ambasadorit Amui për shkak të kulturës së veçantë dhe qytetërimit mjaft të hershëm të këtij vendi. Kryetari i Bashkisë së Korçës Niko Peleshi, shprehu interesim të veçantë për kulturën iraniane. Ndërkohë Ambasadori Iranian Ali Amui, pasi vlerësoi qytetërimin e Korçës, tregoi predispozicionin e tij për të bashkëpunuar me Bashkinë e Korçës për shkëmbime kulturore duke u shprehur se ai do të miratojë çdo projekt që do të vijë si propozim i Bashkisë së Korçës dhe që do t’i rekomandohet nga Fondacioni Kulturor “Saadi Shirazi”. Biseda është zhvilluar rreth figurës poliedrike të Khajam, i cili është i mirënjohur nga të gjithë me të famshmet “Rubai”, të përkthyera nga Fan S. Noli dhe Hafiz Ali Korça.
Kryetari i Bashkisë së Korçës, Niko Peleshi dhe Ambasadori iranian në Shqipëri Ali Amur, morën pjesë më pas, në Simpoziumin Shkencor: “Khajami mes Nolit dhe Hafiz Ali Korçës”në kuadrin e Vitit Ndërkombëtar të Afrimit të Kulturave, të shpallur nga UNESCO.