Prej disa vitesh, “MIo” i madh vjen në qytetin e Korçës me dy evente të mëdha, Kolonina Ndërkombëtare e Artistëve Figurativë “Ditët e Mios” si dhe Konkursi i Pikturës ” MIO”, të organizuara nga Bashkia Korçë, Qendra Kulturore “Vangjush Mio” në bashkëpunim me Shoqatën e Artistëve Figurativë të qytetit të Korçës.
Ndërsa Kolonia Ndërkombëtare e Artistëve Figurativë “Ditët e Mios” shënoi vitin e tretë të organizimit, Konkursi “Mio” ka një histori më të hershme, duke i pasur fillesat e organizimit të tij që në vitin 2001. Në këto dy evente marrin pjesë piktorë nga Shqipëria, Kosova, Maqedonia e Greqia por edhe piktorë nga vende të tjera të Europës. Eksperienca gjatë viteve jep mundësinë për të menduar zgjerimin e gjeografisë së atristëve pjesëmarrës për t’i dhënë qytetit tonë vlerat dhe dimensionet që ai meriton. Piktorët por edhe fotografët, realizojnë punimet e tyre në qytetin e Korçës dhe rrethinat e tij. Ky eveniment ka si qëllim promovimi e vlerave natyrore, kulturore dhe artistike të qytetit tonë si dhe pikat turistike të trevës – Voskopoja, Dardha, Vithkuqi, Bozdoveci, Kamenica etj.
Organizatorët venë në dispozicion të gjithë bazën materiale të kësaj kolonie dhe në përfundim të gjithë piktorët dhe fotografët pjesëmarrës me një nga veprat e tyre pasurojnë fondin e Galerisë së Arteve “Guri Madhi”. Ekspozita çelet në ambjentet e Qendrës Kulturore “ Vangjush Mio” ditën e fundit të këtij aktiviteti.
Për piktorët Korça mbetet një studio e madhe, me hapësira për t’u eksploruar, befasuese për pasurinë që mbart e cila është mjaft frymëzuese për të ushtruar talentin e tyre. Aktiviteti që është kthyer tashmë në një traditë të përvitshme, synon jo vetëm vendosjen e urave të komunikimit mes atristëve, por sidomos promovimin e vlerave të qytetit.