Bashkia e Korçës në bashkëpunim dhe me mbështetjen financiare të UNDP-së po ndërmerr një sërë hapash me qëllim zbatimin e iniciativës së titulluar „Ndërtimi i Sistemit të Reagimit të Koordinuar të Komunitetit kundër Dhunës në Familje në qytetin e Korcës“. Synimi kryesor është marrja e masave për plotësimin e detyrimeve përkatëse në funksion të zbatimit të Ligjit nr. 9669, datë 18.12.2006 „Për Masa ndaj Dhunës në Marrdhëniet Familjare“, si dhe të Strategjisë Kombëtare për Barazinë Gjinore dhe Dhunën në Familje 2007 – 2010.
Ky synim mendohet të arrihet nëpërmjet ndërtimit të strukturave, modeleve, marrëveshjeve të bashkepunimit ndërinstitucional, si dhe investimeve e shërbimeve në përgjigje të fenomenit dhe trajtimit me efektivitet të rasteve të dhunës në familje.
Iniciativa për ndërtimin e sistemit të reagimit të koordinuar të komunitetit kundër dhunës në familje, shkon në linjë dhe me programin „Qyteti Social“, nëpërmjet realizimit të të cilit synohet inkurajimi i aktorëve socialë, individëve, shkollave të qytetit, etj për të marrë përgjegjësi për edukimin e fëmijëve si dhe për të inkurajuar aktorët lokalë të bëhen pjesë e rëndësishme e këtij sistemi.
Në kuadër të realizimit të këtyre iniciativave, ftohen të gjitha organiazatat jo-fitimprurëse që punojnë me të njëjtin mandat dhe që kanë ekspertizën dhe interesin e veçantë në fushën e dhunës në familje, të bëhen pjesë e këtij sistemi, duke sjellë propozime specifike në lidhje me ofrimin e shërbimeve për mbrojtjen dhe trajtimin e rasteve të viktimave të dhunës në familje.
Për më shumë detaje ju lutem referohuni tek seksionet në vijim të këtij njoftimi.
Prioritetet
Kjo iniciativë specifike targeton të gjitha organizatat jo-fitiprurëse të qytetit të specializuara apo me një historik të punës së tyre në fushën e mbrojtjes së të drejtave dhe mbështet iniciativat që përmiresojne cilësinë e jetës së qytetarëve në kuadër të:
Përmirësimit të sistemit të mbrojtjes dhe trajtimit të viktimave të dhunës në familje;
Sensibilizimit të komunitetit në lidhje me fenomenin, shkaqet dhe pasojat;
Ofrimit të ndihmës konkrete për viktimat e dhunës në familje, duke bërë të mundur menaxhimin e rastit deri në zgjidhjen e tij;
Koordinimit të veprimeve me aktorë/donatorë të tjerë lokalë apo kombëtarë.
Kriteret e përzgjedhjes.
Projekti i përzgjedhur duhet të përmbushë këto kritere:
Të sjellë risi;
Të ketë rezultate konkrete, të formuluara qartë dhe të arritshme;
Të jete sa më gjithpërfshirës;
Të ketë një strategji publiciteti;
Të jetë i qëndrueshëm.
Në mënyrë më specifike, prioritet do t’ju jepet projekteve që mundësojnë veçanërisht shërbimet këshillimit psikologjik dhe , strehimit dhe mbulimit të nevojave të tjera bazë të viktimave të dhunës në familje.
Pjesëmarrësit.
Të gjitha Organizatat jo-fitimprurëse që ushtrojne aktivitetin në Bashkinë e Korçës.
Juria
Procesi i seleksionimit dhe përzgjedhjes do të realizohet nga një panel ekspertësh me përfaqësues nga Bashkia, PNUD, Drejtoria Arsimore dhe ekspertë të Shërbimit Social Shtetëror.
Granti.
Iniciativa e përzgjedhur do të mbështetet me një grant prej 500.000 (pesëqind mijë) lekësh.
Kohëzgjatja e Shërbimit
Iniciativa e propozuar duhet të shtrihet në një kufi kohor 12 mujor
Afati i fundit i aplikimit është data 30 maj 2010
Për detaje të mëtejshme referohuni tek Termat e Referencës në vijim të këtij njoftimi.
Dokumentat e nevojshme për aplikim:
Kërkesë për të bashkëpunuar me Bashkinë në kuadër të iniciativës së sipërpërmendur;
Projekt propozimi, plani i aktiviteteve dhe buxheti përkatës, i specifikuar në lekë, i ndarë në tre mujorë.
Historik i shkurtër i organizatës, në të cilin të përshkruhet misioni dhe vizioni, si dhe të përmendet eksperienca juaj specifikisht në trajtimin problemeve të grave dhe specifikisht të cështjeve të dhunës në familje;
Fotokopje e noterizuar e licensës së qendrës suaj (lëshuar nga MPÇSSHB)
Përshkrim i stafit të punësuar (shoqëruar me organogramën e qendrës). Për profesionistët Psikolog/e, Punonjës Social/e dhe Avokat/e, nevojitet plotësimi i dokumentacionit me CV dhe kualifikimet përkatëse. Gjithashtu OJF-ja duhet të paraqesë edhe dokumenta të tjera shtesë në funksion të stafit të punësuar, psh Certifikatë e rregjistrimit pranë ISSH, apo kopja e listëpagesës më të fundit të dorëzuar pranë Sigurimeve Shoqërore (kopja e muajit Prill, e cikluar nga SSH);
Dokumentim i viteve të ekperiencës dhe bashkëpunimeve të mëparshme të suksesshme me Bashkinë Korçë
Vërtetim i qëndrueshmërisë financiare të paktën deri në fund të vitit 2010.
Duke shpresuar në një bashkëpunim të suksesshëm, mirëpresim aplikimet tuaja,
Sinqerisht,
KRYETARI
Niko PELESHI