Qyteti i Korçës, ashtu si dhe disa qytete dhe fshatra të vendit kanë ruajtur dhe lëvruar tradicionalisht festimin e Karnavaleve. Në kushtet e një shoqërie demokratike kjo traditë e bukur popullore në vendin tonë dhe veçanërisht në Korçë rizgjohet dhe fiton sërish vlerat e një festimi popullor gazmor.
Tradicionalisht Karnavalet në data dhe muaj të ndryshëm vazhdojnë të organizohen në disa fshatra të qytetit të Korçës. Në qytetin e Korçës janë organizuar dy festivale Kombëtare të Karnavaleve me ndihmën e pushtetit lokal, Ministrisë së Turizmit, Kulturës, Rinisë dhe Sporteve si dhe me ndihmën e madhe të fondacionit Soros në vitin 1994 – 1995. Duke hulumtuar dhe shfrytëzuar vlerat rituale, etnografike, artistike dhe gazmore të kësaj tradite të mirfilltë popullore Bashkia në bashkëpunim me institucionet kulturore organizojnë me rastin e çeljes së sezonit turistik këtë festë kaq popullore dhe demokratike për të ruajtur vlerat e dhjetra viteve më parë duke i dhuruar qytetit një ditë plot kolorit dhe gëzim popullor.
Ky aktivitet ka vendin e vet në fushën e kulturës popullore sepse kultivon vlerat e veçanta folklorike, gojore, imituese, humoristike, xhestikulative dhe muzikore. Festivali nxit interesin e individëve dhe grupeve të organizuar për të krijuar vlerat e reja. Duke njohur dhe përqafuar këtë traditë rinia do të garantojë një pjesëmarrje më të madhe nga viti në vit me dëshirën që karnavalet të bëhen si dikur të përvitshme, të dashura dhe të pranueshme nga të gjithë qytetarët. Kështu Dita e Karnavaleve do të jetë një nga festat më gazmore dhe më popullore të këtij qyteti plot kulturë dhe vlera.
Bashkia dhe institucionet kulturore dhe artistike të varësisë i kanë të gjitha mundësitë dhe eksperiencën për organizimin me sukses të këtij festivali.
Festivali organizohet në qytetin e Korçës në një ditë të caktuar gjatë muajit Qershor. Në këtë festival marin pjesë grupe të veçanta që kanë pasur traditë në festimin e karnavaleve. Korça si vend organizator përfaqësohet me disa grupe. Përveç grupeve të organizuara dhe të parashikuara në platformën e festvalit do të marrin pjesë dhe individë dhe grupe të tjera, pasi të kenë paraqitur më parë platformën artistike të tyre pranë Komisionit organizativ të këtij festivali.
Organizimi
Festivali ka një Këshill Drejtues i cili do të përcaktojë, ndihmojë dhe përzgjedhë platformat e sejcilit grup karnevalesk.
Do të funksionojë gjithashtu dhe një Këshill Organizativ që do të realizojë punën përgatitore, organizimin dhe zhvillimin e këtij Festivali.
Një ndihmë do të japë dhe Shoqata e Karnavaleve me presidente Znj. Dhurata Lila e cila është e inkuadruar në konventën e Karnavalit Europian dhe ka një eksperiencë dhe njohje të madhe në këtë fushë.
Këshilli Organizativ pasi të njohë platformat dhe përgatitjet përfundimtare të sejcilit grup do të përpilojë platformën, zhvillimin artistik dhe lëvizjen e grupeve gjatë paradës së Karnavaleve.
Festivali konceptohet si një manifestim në formë parade të grupeve dhe individëve të stacionuar në disa pika për komunikim me publikun.
Për të stimuluar cilësisht këtë festival do të ketë dy çmime për individë apo grupe.
Grupet e huaja pjesëmarrëse i japin një vlere të madhe festivalit që do ta bëjnë këtë festë më të gëzueshme dhe më me kolorit.