51 nxënësit më të mirë nga 7 shkolla të mesme të qytetit të Korçës përfituan një bursë nga Bashkia. Për të dytin vit, Bashkia e Korçës aplikon projektin në kuadrin e programit “Qyteti për të rinjtë” , e cila shërben jo vetëm për të stimuluar të rinjtë, por për të treguar që Bashkia e njeh dhe e vlerëson kontributin e tyre.
– Ju jeni jo vetëm krenaria e shkollës dhe e prindërve por edhe krenaria e qytetit, -ju drejtua nxënësve të pranishëm Kryetari i Bashkisë Niko Peleshi, i cili më pas u dorëzoi çertifikatën e mirënjohjes. Kryebashkiaku Peleshi u bëri apel institucioneve në qytet, biznesit privat dhe partnerëve të tjerë, të bashkojnë forcat për të hartuar politika të tilla, të cilat do ta bëjnë më tërheqës qytetin në mënyrë që këta të rinj që nesër do të jenë elita e shoqërisë të kontribuojnë për qytetin e tyre.