Në krye të 96 viteve te tij, inxhinieri i projektimit të dhjetra lulishteve në disa qytete të vendit, Vasil Shqau merr titullin “Qytetar nderi” i qytetit të Korçës. Këshilli Bashkiak i qytetit të Korçës, me një vendim të muajit mars të këtij viti, i akordon Vasil Shqaut titullin e lartë “Qytetar Nderi” me motivacionin: ” Inxhinierit të nderuar, që i kushtoi gjithë jetën e tij projektimit dhe realizimit të gjelbërimit, korçarit që nuk rreshti së dashuri dhe zbukuruari qytetet dhe parqet e Shqipërisë”.
Në ceremoninë e rastit, ku morën pjesë intelektualë, miq dhe të afërm të tij si dhe përfaqësues të Shoqatës Kombëtare të Inxhinierëve dhe Pyjeve dhe Drejtorisë së Shërbimit Pyjor në Korçë, të cilët paraqitën propozimin e tyre pranë Bashkisë Korçë, titulli iu dorëzua të birit, Thoma Shqau, nga Kryetari i Këshillit Bashkiak Gjergji Pendavinji dhe Kryetari i Bashkisë Niko Peleshi.
Kontributi i kësaj figure të inxhinierisë bimore, ka lënë gjurmët e veta në krijimin e muzeut të Shkencave të natyrës, në krijimin e Kopshtit Botanik në Tiranë, në projektimin dhe zbatimin e ndërtimit të Parkut të Madh të Tiranës, në realizimin e Parkut “Rinia” në Korçë, në realizimin e gjelbërimit të spikatur në Vlorë si dhe mjaft studime shkencore. Për kontributin e tij të shquar është dekoruar me urdhëra e medalje të shumta ku mund të përmendim “Medaljen e Mirënjohjes” “Për kontribut të rëndësishëm në zhvillimin dhe mbrojtjen e pyjeve dhe në zgjidhjen e një sërë problemesh të biologjisë në vendin tonë”, që është medalja e parë që është dhënë në fushën e mbrojtjes së mjedisit.