Ekspertë të studios izraelite Lerman Architects Plans and Regulations, të cilët fituan të drejtën nëpërmjet qeverisë shqiptare për hartimin e Planit Rregullues –Urbanistik të qytetit të Korçës të financuar nga Banka Botërore zhvilluan një tur studimor në qytetin e Korçës. Ky është takimi i tretë i Bashkisë Korçë me ekspertët, këtë herë i shoqëruar me takime të tjera me drejtues të sektorëve në bashki edhe me prezencën e institucioneve më të rëndësishme në qytet si KESH, UKKO, ALB Telecom, Këshilli i Qarkut, REC etj. Kryetari i Bashkisë Niko Peleshi prezantoi vizionin dhe potencialet humane dhe ekonomike që qyteti ka duke iu përgjigjur edhe pyetjeve të ekspertëve.
Plani Rregullues, – tha Kryebashkiaku Peleshi, -do të jetë pasqyrim i tendencës së zhvillimit ekonomiko-shoqëror të qytetit. Me të, do të shtrohen shinat për qytetin e së nesërmes. Plani do të mbajë parasysh masterplanin e qendrës së qytetit të hartuar nga studioja gjermane Bolles & Wilson në Konkursin Ndërkombëtar për Qendrën e Korçës të zhvilluar në muajin korrik të këtij viti.
Afati për dorëzimin e Planit Rregullues të përfunduar është shtatori i vitit të ardhshëm.