Mbi 40 fotografi të studentëve të Shkollës Verore të Fotografisë u ekspozuan më 18 shtator në Galerinë “Guri Madhi” pranë Qendrës Kulturore “V.Mio”.
Ky është viti i dytë që Bashkia e qytetit aplikon këtë projekt, duke nxitur të rinjtë të eksplorojnë qytetin nëpërmjet aparatit fotografik, të kërkojnë tematika të reja, duke i kthyer ato në artin e bukur të fotografisë, për të cilën qyteti ynë ka një traditë të pasur.
Fotografitë e ekspozuara, me tematikë të ndryshme dhe krejtësisht të lirë, spikatën për këndvështrime të shumëllojshme dhe përpunim artistik të ideve. Prania në këtë shkollë e disa prej nxënësve të Shkollës Artistike “Tefta T.Koço” tregon për prirjen që kanë këta të rinj për artin në përgjithësi.
Në përfundim të kësaj shkolle Bashkia Korçë synon të nxjerrë një gjeneratë të rinjsh që e duan qytetin duke dokumentuar trashëgiminë e pasur kulturore dhe arkitektonike.