„ Sot fillojmë një kapitull të ri, i cili do të vendosë përfundimisht
shinat për Korçën e ardhshme në pikëpamjen e urbanistikës dhe
arkitekturës, pasi kontakti më i rëndësishëm dhe imazhi i qytetit është
qendra. Qendrat nuk janë thjesht një kompleks ndërtimesh, ato kanë
brenda filozofinë dhe shpirtin e njeriut“, -është shprehur
Kryebashkiaku Peleshi.
Kjo zonë është hapësira kryesore publike e grumbullimeve masive për të
gjithë korçarët, një objekt parësor për turistët, dhe një vend historik
për qytetin.
Studimi i Qendrës së qytetit është pjesë e përpjekjeve të Bashkisë për
të zbukuruar dhe restauruar hapësirat publike, për të kultivuar një
kuptim të ri të krenarisë qytetare tek korçarët dhe për të frymëzuar
gjeneratën pasardhëse për ta zhvilluar më tej këtë qytet.
Mbi 100 studio prestigjioze vendase e të huaja, do të marrin pjesë në
një garë me projektet e tyre. Studioja fituese do të kontraktohet nga
Bashkia e Korçës dhe do të jetë ajo, që do të zhvillojë në detaje
projektin, i cili do të udhëheqë Bashkinë e Korçës në realizimin e
vizionit të saj për qytetin.