Blloku i Shën Mërisë, model investimi
Të shtunë, në datën 7 shkurt, Kryetari i Bashkisë Korçë Niko Peleshi
dhe deputeti Korçës Ben Blushi, përuruan investimin më të madh të
realizuar me fondet e Bashkisë së qytetit, Sistemimin e Bllokut të Shën
Mërisë dhe Rrugës 1-Maji.
Kjo ka qenë një ndërhyrje model, pasi integroi punën e tre
institucioneve. Krahas asfaltimit dhe krijimit të sipërfaqeve të
gjelbra së bashku me vendosjen e koshave të vegjël, stolave të rinj dhe
plotësimin e sistemit të ndriçimit, me fondin prej 40 milion lekësh nga
të ardhurat e Bashkisë Korçë, u krye edhe rehabilitimi i sistemit të
kanalizimeve të realizuar nga Ndërmarrja e Ujesjellësit si dhe
ndërhyrja e Albtelekomit, e cila mundëson plotësimin në një perspektivë
afatgjatë të nevojave të qytetarëve.
Pasi ka shtrënguar duart me qytetarët e këtij bllokbanimi, të
pranishëm në ceremoninë e përurimit të këtij investimi, Kryebashkiaku
Peleshi theksoi se ky komuninet e meriton investimin, pasi ka treguar
se di të mirëmbajë e jo të dëmtojë atë që ndërtohet.
Njëkohësisht ai ka theksuar, se miratimi sa më parë i Buxhetit të
Bashkisë Korçë për vitin 2009, do të thotë hapja e rrugës për investime
të këtij lloji edhe në pjesë të tjera të qytetit të Korçës.