“Ne duhet të realizojmë çdo ditë, vlera arsimore dhe edukative me moton: Shkolla e mesme nuk është një orë dhe një vend, por një pasuri e madhe mendore për nxënësit, prindërit dhe mbarë shoqërinë”.
Në këtë mënyrë u uroi mirëseardhjen nxënësve të Shkollës së Mesme të Përgjithshme “Raqi Qirinxhi”, Drejtori i Shkollës Gjergji Çikopani, në ditën e parë vitit të ri akademik 2008-2009. Në ceremoninë e rastit ishte prezent Kryebashkiaku i Korçës z.Niko Peleshi, i cili zgjodhi shkollën ku ai ka qenë vetë nxënës, për t’u uruar suksese të gjithë nxënësve të qytetit të Korçës.
Arsyeja tjetër përse Kryetari z.Peleshi zgjodhi këtë shkollë për të qenë prezent në ditën e parë të fillimit të saj, ishte përurimi i fushës së tenisit. Ngritja e kësaj fushe e mundësuar nga Bashkia Korçë dhe Drejtoria Arsimore Rajonale, me vlerën prej afro 30 000 euro, do të hyjë në historinë e shkollës dhe të qytetit si e para fushë tenisi në qytet mbas mëse gjysëm shekulli.
Bashkia e Korçës ka në programet e veta mbështetjen e të rinjve, duke synuar stimulimin e tyre për rezultate më të mira, në mënyrë që të krijohet një gjeneratë specialistësh të aftë, të cilët do të jenë në gjendje të projektojnë të ardhmen.
Në përputhje me këtë vizion, Bashkia e qytetit këtë vit mbështeti moralisht dhe materialisht 25 maturantët më të mirë, duke i dhuruar sejcilit nga një kompjuter. Njëkohësisht nxënësit më të mirë të këtij viti do të marrin nga një bursë mujore nga fondi i Bashkisë Korçë.
Projektet e bashkisë në mbështetje të nxënësve nuk mbarojnë këtu. Duke filluar nga muaji i ardhshëm, tre shkolla në qytet duke përfshirë edhe Shkollën “Raqi Qirinxhi”, do të pajisen me internet falas, 24 orë në ditë, duke shënuar një përmirësim të dukshëm në infrastrukturën e teknologjive të reja të informacionit dhe rrjedhimisht të mësimdhënies në shkollat më të rëndësishme të qytetit të Korçës.
Suksese dhe një vit të mbarë shkollor për të gjithë !