Kurora dhe buqeta me lule tek lapidari memorial në përkujtim të Manifestimit Antifashist të 9 shtatorit 1943. Manifestimi Antifashist i 9 shtatorit të vitit 1943 ka hyrë në historinë tonë, si manifestimi paqësor më i përgjakshëm në historinë e luftës.
Ky memorial është simbol i përpjekjeve të shumta të qytetarëve të Korçës për liri, pavarësi dhe identitetin kombëtar. Me këtë rast, kurora e buqeta me lule u vendosën nga Bashkia Korçë, Prefektura, Këshilli i Qarkut, shoqatat e veteranëve të luftës e famljarë.
Në simpoziumin e mbajtur në sallën e Teatrit “A.Z.Çajupi”, Shefqet Pojani me cilësinë e Kryetarit të Komitetit të Veteranëve të Korçës, risolli për të pranishmit episode të ngjarjes, duke treguar forcën, solidaritetin, guximin dhe trimërinë, cilësi këto që karakterizuan popullin e Korçës në ato momente të gëzueshme por edhe tragjike njëkohësisht.
Të pranishmit i përshëndeti edhe Nënkryetari i Bashkisë së Korçës Arjan Bejko, i cili e vlerësoi këtë ngjarje si një moment të rëndësishëm në historinë e Korçës dhe të të gjithë Shipërisë. Ai theksoi se në themel të zhvillimeve të sotme, siç është rreshtimi i Shqipërisë në NATO krahas vendeve më të zhvilluara europiane, qëndron historia jonë.
Përkulje dhe nderim për të rënët e 9 shtatorit!
Ngjarja
Ç’ndodhi më 9 shtator 1943
Më 9 shtator 1943, gati 10 mijë qytetarë të Korçës, të organizuar nga Këshilli Nacionalçlirimtar i rrethit, dolën në sheshet kryesore të qytetit për të demonstruar paqësisht kapitullimin e italisë fashiste. Krahas thirrjeve të gëzuara për fitoren ndaj okupatorit të huaj, një thirrje iu drejtohej edhe ushtarëve dhe oficerëve italianë të mbetur, për të dorëzuar armët dhe për t’ju bashkuar ushtrisë shqiptare deri në arritjen e fitores përfundimtare ndaj fashizmit. Por ndaj manifestuesve paqësorë e të paarmatosur, dy autoblinda italiane filluan pa paralajmërim të qëllonin duke shkaktuar 32 të vrarë kryesisht gra e vajza dhe mbi 120 të plagosur. Gjaku i tyre skuqi bulevardet e Korçës duke e kthyer ketë manifestim paqësor në një ngjarje të dhimbshme e cila shënon, manifestimin paqësor më të përgjakshëm të histrorisë sonë të luftës. Qytetarët e Korçës, megjithëse në kushte shumë të vështira, i ndihmuan dhe i kuruan të plagosurit. Të vrarëve iu bënë të gjitha nderimet, duke i përcjellë deri në banesën e fundit.
Menjëherë tek qytetarët u ndez shpirti i hakmarrjes duke bërë që të dënohen autorët e kësaj ngjarje tragjike si dhe iu dha goditja përfundimtare okupatorit fashist.