Bashkia e Korçës ka çelur kurset 4-mujore për të gjithë fëmijët e moshës nga 6 deri 14 vjeç, të cilët janë të apasionuar pas vizatimit, poçerisë, kitarës, baletit dhe fotografisë. Projekti i cili mban emrin “Artistët e vegjël”, është pjesë e Programit të Bashkisë “Qyteti për fëmijët” dhe synon mësimin e arteve të ndryshme mbi baza profesionale, përfshirjen e të talentuarve dhe të apasionuarve në to,si dhe rigjallërimin e traditës dhe angazhimin e fëmijëve në tematika të panjohura më parë.
Çelja e Projektit “Artistët e vegjël” u prezantua për të gjithë fëmijët e prindërit në mjediset e Qendrës Kulturore “V.Mio”. Në të ishin prezent Kryetari i Bashkisë Niko Peleshi si dhe Drejtori i Raiffeisen Bank, Erjon Daçolli.
Në fjalën përshëndetëse, Kryetari i Bashkisë Korçë Niko Peleshi, ndër të tjera nënvizoi se nëpërmjet këtij programi, Bashkia synon të përgatisë brezin e ri, duke zhvilluar e rigjallëruar disa vlera të hershme artistike të qytetit të Korçës. Në vijim të rivlerësimit të traditës, Kryebashkiaku Peleshi, gjeti rastin të prezantojë para auditorit projektin më të ri të Bashkisë Korçë: Një nga sheshet e qytetit po projektohet në formën e mandolinës dhe synohet që ky shesh të mbajë emrin e serenatës korçare, një nga simbolet më të spikatur identifikues të qytetit të Korçës.
Edhe Erjon Daçolli, me cilësinë e Drejtorit të Bankës Raiffeisen që ka mbështetur këto kurse, u ka uruar fëmijëve pjesëmarrës suksese. Motoja e Bankës Raiffeisen është :”Të ndihmojmë ata që ndihmojnë veten”. Ai e ka siguruan Kryetarin e Bashkisë z.Peleshi se mbështetja e tij në projekte që nxitin dhe zhvillojnë talented, do të jetë e vazhdueshme.
Kurset janë pa pagesë dhe me një personel të kualifikuar.
Ato kanë filluar në datë 8 shtator dhe do të shtrihen deri në fund të muajit dhjetor të këtij viti.. Kurset e vizatimit, kitares dhe fotografise do te zhvillohen tek Qendra Kulturore “Vangjush Mio”. Kursi i baletit tek “Have a Dream Academy” tek Rr. “Niko Kovaçi” (ish dritat e verdha). Ndërkohë Kursi i poçerisë do të zhvillohet tek punishtja e z. Vasillaq Kolevica në Rruga Korçë – Drenovë (përballë Pularisë “Shehu”).
Në fund të kurseve fëmijët do të pajisen me çertifikatë.