Në sallën e koncerteve të Qendrës Kulturore “V.Mio”, trioja Shirli Polena –soprano, Adrian Xhema-tenor dhe Kristina Laco në piano, dhanë një koncert vokal-instrumental.
Koncerti i mbështetur nga Bashkia Korçë dhe Qendra Kulturore “V.Mio”u organizua në kuadër të sezonit koncertor të muzikës dhe mund të konsiderohet ndër më të rëndësishmit për shkak të emrave të spikatur që morën pjesë në të. Krahas sopranos së mirënjohur me origjinë korçare Shirli Polena, pianistes Kristina Laço, aktualisht Pedagoge në Akademinë e Arteve, për herë të parë vjen në Korçë tenori po kaq i mirënjohur Adrian Xhema, me një karrierë mjaft të suksesshme brenda e jashtë vendit, fitues i disa çmimeve kombëtare e ndërkombëtare. Xhema është aktualisht solist pranë Operas së Mynihut në Gjermani. Në koncertin e dhënë për artdashësit korçarë, Xhema e Polena dalluan për vokalin e tyre të spikatur dhe forcën interpretative dhe repertorin e pasur.
Në repertorin e artistëve bënin pjesë vepra të klasikëve më të mëdhenj botërorë Schubert, Puccini, Mozart etj, të cilat u interpretuan herë solo e herë duet të shoqëruar nga pianistja Kristina Laço.
Koncerti u ndoq nga një numër mjaft i madh artdashësish, intelektualë e njohës të kësaj muzike dhe spikati për nivel mjaft të lartë artistik.