Për 4 net më rradhë, në datat 14-17 gusht, Bashkia e Korçës
organizoi Festën e Birrës e cila shënoi kulmin e sezonit turistik për
qytetin . Pas suksesit të një viti më parë, kjo festë erdhi këtë vit,
në edicionin e dytë të saj, e shumëfishuar në të gjitha komponentët.
“Festa e birrës … Vetëm në Korçë”, ishte slogani i festës, i cili
arriti të realizojë mjaft mirë synimin e bashkisë duke tërhequr një
numër mjaft të madh qytetarësh e vizitorësh, vendas e të huaj,që
festuan dhe u argëtuan së bashku deri në orët e vona të natës. Me
siguri, Festa e Birrës në Korçë, mund të quhet festa e traditës.
Birra dhe produket e traditës
Këtë vit u rrit numri i kompanive pjesëmarrëse, të cilat së bashku
me sponsorat siguruan edhe mbështetjen kryesore financiare për
realizmin e Festës së Birrës. Në tendat e ngritura në sheshin e festës
u servirën Birra Korça, Stela, Skopsko, por edhe Red Bull, si dhe
produket shqiptare të zgarës, kërnace, qofte e kolloface të sallamerive
“Fix” e “Tona”, si dhe ëmbëlsira të Pasticeri “Dajana”. I rëndësishëm
është fakti se më të preferuarat ishin produket e vendit, të cilat u
konsumuan shumë herë më tepër se ato të importuarat. Birra më e
preferuar ka qenë “Birra Korça” me 80 mijë gota të konsumuara gjatë
këtyre katër netëve.
Atmosfera festive
Stafi organizator i festës kishte menduar deri në detaje për të
krijuar një atmosferë sa më festive. Ambienti i festës ishte zbukuaruar
edhe me elementë të veçantë dekorimi të përdorura për herë të parë në
qytet. Gjithashtu u trefishua kapaciteti i tavolinave që u vunë në
dispozicion të qytetarëve, të cilat me siguri ishin të pakta krahasuar
me pjesëmarrjen. Sheshi para Pallatit të Sportit “Tamara Nikolla”,
lulishtet në të dy krahët por edhe në brendësi të Parkut “Rinia”,
gjatë 4 netëve ishin mbushur plot, jo vetëm me të rinj por nga të
gjitha moshat. E veçanta ishte një pjesëmarrje mjaft e madhe e të
rinjve nga rrethinat të cilët u bënë edhe protagonistë të skenës në
lojrat argëtuese të skenës.
Për herë të parë Festa e Birrës ka një logo zyrtare, e cila do të
jetë elementi i përvitshëm identifikues i festës, një faqe zyrtare
interneti www.festaebirres.com
si dhe suvenire. Festa u promovua jo vetëm në rajonin e Korçës si dhe
qytetet kryesore shqiptare, por edhe në Selanik, Follorinë, Kostur,
Strugë etj. Në hyrje të sheshit të rijtë e forumit virtual
Korcajone.net ngritën një Info Point që ofronte të gjithë
informacionin e mundshëm jo vetëm për festën por për të gjithë qytetin
e rajonin.
Programi i festës ka qenë i larmishëm. Gjatë katër netëve në skenën e
festës janë ngjitur emrat më të njohur të muzikës shqiptare si motrat
Libohova, Redon Makashi, Aleksandër Gjoka, Bledar Seiko, Anxhela
Peristeri, Kamela&Genti, Eneida Tarifa,Bojken Lako Grupet muzikore
“Djemtë e Detit”, “Burn”, këngëtarët korçarë Eli Fara,Overdrive ,
Vëllezërit Prifti, Mateus Frroku e Laxarela si dhe surpriza e festës
grupi shqiptar nga Tetova “Elita 5” i cili e ka ndezur mjaft atmosferën
duke shënuar edhe kulmin e saj.
Ndërkohë gjatë gjithë netëve nuk kanë munguar drejtues të Bashkisë
Korçë, Kryebashkiaku Niko Peleshi dhe dy zëvendësit e tij Sotiraq Filo
e Arjan Bejko si dhe një pjesë e konsiderueshme e stafit.
Përmes këtyre organizimeve, Bashkia Korçë synon kthimin e kësaj
festë në një traditë të përvitshme me përmasa gjithnjë e në rritje,
duke bërë të mundur gjallërimin e jetës në qytet si dhe tërheqjen e sa
më shumë turistëve vendas dhe të huaj.
Firmat pjesëmarrëse:
Birra Korça, Birra Stela, Sallameri Tona, Sallameri Fix, Pastiçeri Dajana
Sponsor:
Union Bank, Emporiki Bank, Ëestern Union, Kapurani Viara, Birra Gösser, QTU & EuroMax, Red Bull, Fondacioni Kenedi