Korca Shpirti i Tradites

korca_shpirti_i_traditesProgrami “Shpirti i traditës” vjen si një konceptim i ri i kultivimit dhe përçimit të traditës së qytetit në aspekte të ndryshme, sepse vetë qyteti i Korçës konsiderohet si një nga qytetet me një spektër të gjerë artistik e kulturor që e ka zanafillën prej shekujsh dhe që ka nevojë të rimëkëmbet dhe të marrë famën e dikurshme.
Ky program përfshin disa projekte të rëndësishme:

1. Projekti “Kalendari i sezonit festiv / guida e xhepit” – Kalendari i aktiviteteve (shqip-anglisht) vjen si një risi dhe ka të bëjë me përpilimin e një broshure promocionale të të gjitha aktiviteteve social-kulturore, sportive që do të organizojë Bashkia e Korçës gjatë vitit 2008. Ky kalendar do të shoqërohet edhe me një guidë xhepi të atraksioneve kryesore turistike të Korçës. Projekti synon promovimin e aktiviteteve te qytetit si dhe atraksioneve turistike të mundshme për te tërhequr sa më shumë vizitorë vendas apo të
huaj.   

2. Projekti “Ju duam shume“ – organizohet për herë të parë në ditën e festës ndërkombëtare të gruas  për të rikujtuar  e theksuar faktin se nënat dhe gratë korçare janë një pjesë e  rëndësishme e shoqërisë. Projekti konsiston në shpërndarjen rastësore të luleve, të shoqëruara me 1 mini-kartolinë urimi me rastin e festës së 8 Marsit. Lulet do të shpërndahen në pika kyçe të qytetit nga 15 studentë dhe nxënës (pjese e senatit rinor) të veshur me bluza me simbolet përkatëse dhe me mesazhin kushtuar nënave dhe grave “Ju duam shumë!”  

3. Projekti “Panairi i Poçerisë” – përbën një nismë të re dhe do të zhvillohet në muajin prill 2008. Ky projekt synon ekspozimin e produkteve të poçerisë me pjesëmarrje nga prodhues vendas dhe të huaj, ripërtëritjen e traditës së përpunimit të baltës, promovimin e këtyre objekteve në vendet e tjera dhe kthimin e këtij aktiviteti në një aktivitet te përvitshëm.

4. Projekti “Festa e lakrorit” – është një iniciative e re dhe synon promovimin e artit gastronomik të kultivuar në vite në qytetin e Korçës. Njëkohësisht ai do të shërbejë dhe si një mënyrë e re vlerësimi dhe respekti për mundin e amvisave. Lakrori me dy petë do të jetë simboli i festës, por gjithashtu panairi do të jetë i hapur për të gjitha llojet e gatimeve tradicionale. Qellimi eshte ekspozimi i këtij gatimi tradicional që do t’i shërbejë ruajtjes së kësaj tradite, duke mundësuar futjen e tij në menytë e restoranteve të gastronomisë tradicionale lokale.

5. Projekti “Për një Korçë më të pastër”- Në ditën e Mjedisit, nxënës dhe studentë nga shkollat tetëvjeçare, gjimnazet dhe universitetet  të pajisur me doreza plastike dhe qese të zeza si dhe me bluza me simbolet përkatëse japin ndihmesën e tyre ne pastrimin e qytetit. Qëllimi i këtij aktiviteti është ruajtja dhe përçimi  i traditës së vjetër korçare si një qytet model përsa i përket pastërtisë.

6. Projekti “Karnavalet e Korçës”- Festimi i karnavaleve ka qenë një traditë e hershme e qytetit të Korçës dhe është një nga festat unikale që ka ky qytet në krahasim me qytetet e tjera. Pavarësisht se kjo traditë është festuar pothuajse çdo vit, organizimi i tyre ka qenë spontan. Qëllimi i realizimit të këtij projekti është jo vetëm ruajtja e përçimi i kësaj tradite por dhe organizimin e saj si një festë jo vetëm për Korçën por dhe më gjerë.
Kjo do të çojë në traditën e prodhimit, tregëtimit të maskave, gjallërimin dhe argëtimin e të gjithëve dhe promovimin e kësaj tradite, në vend dhe më gjerë.

7. Projekti “Java e kinemasë” – do të organizohet për herë të parë brenda sezonit turistik veror 2008. Në një nga sheshet publike më të populluara të qytetit,  përgjatë një jave, çdo ditë,  do të shfaqen në një ekran të madh 2-3 filma të kategorive të mëposhme.

    * Filmi për fëmijë
    * Filmi dokumentar
    * Filmi shqiptar
    * Koleksioni  i filmave të vjetër
    * Komedi

Qëllimi i këtij projekti konsiston në gjallërimin e jetës në qytet gjatë sezonit turisrtik si dhe afrimin e qytetarëve korçarë me kinemanë.

8. Projekti “Java e Muzikës” – është gjithashtu një iniciativë e re që ka si qëllim pasurimin e jetës muzikore me elementë të rinj, gjallërimin e jetës në qytet nga muzikantë profesionistë dhe amatorë të apasionuar pas muzikës dhe artit muzikor, si vazhdimësi e këngës dhe melodisë së Tefta Tashko Koços, këngëve patriotike të Korit “Lyra”, kitarave të serenatave të famshme korçare.Java e muzikës do të organizohet brenda sezonit veror.Gjatë një jave (6 ditë) në pika të ndryshme të qytetit do të ketë një aktivitet
muzikor të caktuar.

9. Projekti “Festa e Birrës” – Duke marrë shkas nga suksesi i këtij projekti verën e kaluar, ku përmasat e pjesëmarrjes i tejkaluan dhe parashikimet e organizatorëve, duke u kthyer në një eveniment me ndërthurrjen e elementeve të gastronomisë vendase, kulturës, muzikës e humorit pati një promovim të suksesit të jashtëzakonshëm të Birrës tradicionale të qytetit të Korçës si një nga prodhimet më të vjetra, cilësore që ka përfaqësuar denjësisht jo vetëm qytetin por dhe vendin në arenën ndërkombëtare duke u vlerësuar dhe me çmime. Për më tepër ky projekt është një hap drejt bashkëpunimit të ngushtë midis qeverisjes vendore, biznesit, traditës dhe komunitetit ku të gjithë janë aktorë dhe në të njëjtën kohë përfitues.
Ky eveniment duke u kthyer në një aktivitet të përvitshëm do të bëjë të mundur promovimin dhe të prodhimeve të tjera të biznesit lokal.

10. Projekti “Java e kulturës” - do të organizohet në fund te muajit shtator,periudhë gjatë së cilës organizohen dhe aktivitete të ndryshme për festimin e ditës kombëtare të trashëgimisë kulturore. Risia e këtij projekti është se çdo ditë do të zhvillohet një aktivitet i caktuar kulturor në qytet me qëllim promovimin e vlerave të spikatura në kulturë, histori dhe art të qytetit.
Java e kulturës do të përfshijë:

    * Vizitë falas në Muzeumet e qytetit
    * Vizitë në Tumën e Kamenicës
    * Panair Libri
    * Ekspozita
    * Aktivitete të tjera të Qendrës Kulturore “V. Mio” dhe teatrit “A. Z. Çajupi

11. Projekti “Panairi i Krishtlindjeve”- Festimet e Krishtlindjeve janë nga më të parapëlqyerat për të gjitha grupmoshat, në të gjitha vendet. Ato përbëjnë një ogur të mirë për arritjet e një viti dhe fillimin e mbarë të vitit në vijim. Pikërisht për t’i dhënë gjallëri qytetit dimëror, madje dhe pamjen e gëzimit të festave, Bashkia Korçë inicon për herë të parë “Panairin e Krishtlindjeve”, i cili do të promovojë produkte të ndryshme që i përshtaten kësaj feste, do të jetë një arsye më shumë për të dalë nga shtëpia, një motiv më tepër për të bërë dhe për të marrë dhurata, një mënyrë të re për të organizuar festat pranë qytetit. Suksesi i këtij projekti vjen dhe si rezultat i mbërritjeve të emigrantëve që kthehen në shtëpi për të festuar me të afërmit dhe gjejnë diçka ndryshe, të ngjashme me vendet ku ata punojnë e jetojnë.
back